- 348 -

1391. Nov. 14. Liegnitz.

Herzog Ruprecht giebt für sich und ah Vormund seiner Brüder der Stadt Machte alles fürstliche Erbgeschoss, 300 Mark jährl. Zinsen, jedermann zu Wiederkauf zu verkaufen.

Wir Ruprecht von gotis gnaden herczog yn Slesien vnd herre czu Legnicz bekennen offintlich mit desym briue allen den, dy en ansehen adir vor den her wirt gelezin, daz wir von vnsers selbis wegen vnd von der hochgebornen furstyn, herczogen Wenczlowis, Bonczlowis vnd Heynrichs, vnser liben brudere wegin, dy do von gotlichin gnadin auch mit vns erpherren syn czu Legnicz, der vormunde wir yczunt syn, vnse swere schadin czu vormyden, vnd vnsen fromen grosslich zu schaffen vnd czu werbin, mit rate vnser getrouwen eldisten ernstlichin beuolen vnd geboten haben den erbern, wyzen ratmannen vnd burgermeystere, den eldisten, den geswornen ows allin hantwerken vnd der ganczin gemeynen vnser stat Legnicz, diedo yczunt syn vnd auch hernoch gekorn vnd syn werdin yn czu kumftigin czyten, vnsern lyben getrouwen, das sy von vnser wegin vorkowfin sulden alle vnser erbgeschos, der do syn dryhundirt marg, daz wir haben vff der obgenanten stat Legnicz czu ierlichem czinse, yczliche marg czinses vm czwelff marg Pregisscher grosschin Polonisscher czal czu rechtem wedirkowfe ydenmanne, der dieselbin kowfin wolde, frauwen also mannen, dy auch vormals von vnser wegin vnd von vnserm gebote vnd beuelunge vorkowft syn, yczliche marg vm czene. Auch habin sy der selbin czinse eyns teyls yczunt vorkowft von vnserm gebote vnd noch eyns teyls vorkowfin sullen vnd irlewbin vnd beuelin en, ap sy dy seibin czinse ymande wedirkowfin wollin, do sy sy nicht gerne hin gebin wolden, daz sy di wedirkowfin vnd abelosen mogen, wen sy vnd alz vffte, alz sy des czu rate werdin, vnd mogen sy andirn lewten vorbas vorkowfin, weme sy wollin, glichir wyze, alz vore were, auch daz daz ymand vndir den lowten, dy den selbin czins vormols czu wedirkowfe yczliche marg vm czehene gekowft habin, sy vorbas behalden vnd habin woldin, so sullin vnd mogin dy vorgenanten burgermeyster vnd ratmanne, dy do yczunt syn vnd her noch vnser stat Legnicz gekorn werden yn czukunftegin czyten, mit yn sulchin kowff haldin vnd machen, das sy en gebin vff yczliche marg czinses czwn marg grosschin, also das sy vorbas steen sullin vnd werdin czu wedirkowfe yczliche marg vm czwelffe der egenanten dryhundirt marg erbe geschosses, dy irlochte furstynne eyns seylgen gedechtnis, frauwe Hedwig, dy vnsers herczogis Ruprechtis elych wyp gewest ist, hundirt schog czu irem lybe, dy wile sy lebete, der seibin hundirt schocke czehen marg czinses, dennoch dy wile sy lebete vorkowft wurdin, so habe wir dy vorgenanten vnser burgermeyster vnd ratmanne mit sebenczehen marken czinsis der selbin czinse vorwyset vnd sy gewyset an Margarethan Engilgerynne, burgerynne czu Bresslow czu irem lybe, dy wile sy lebit, czu hebin vnd czu habin vnd nicht lengir vnd habin en beuolen vnd geboten nwelichen, das sie dy andern acht vnd nwenczig marg czinses vorkowfin, der sy auch eyns teyls yczunt vorkowft habin vnd noch eyns teyls vorkowfin sullin vnd habin daz selbe gelt vnd pfennynge, die man dorumme gegebin hot vnd noch gebin sal vor vns ganz vnd gar cristenen vnd juden, an dy wir sy gewyst haben, beczalt vnd vorrychtit. Doch wolle wir vns vnd vnsern nochkomelyngen erpherren czu Legnicz vnsern vngehindirten wedirkowff derselbin geschosse vnd czinse behalden kegen allen den, den dy selbin czinse vorkowft werdin vm alz vyl geldis alz sy vorkowft werdin, wen wir das vormogin. Auch globe wir den selbin vnsern getrawen lyben, burgermeyster vnd ratmannen, daz wir ydenmanne, dem sy dy selbin vnser geschos vorkowfin losin wollin by synir briue lowt, dy sy den lowtin obir dy czinse gebin, in allin lowten, vorbindungen, globden. artikeln vnd puncten, alz sy ire briue vndir der stat Legnicz ingezegele dorobir gebin, vnd wollin alle lewte, diede dyselbin geschos kowfin genediclich by denselbin czinsen behaldin vnd schuczen noch irre briue lowt, dy sy von der offtgenanten vnser stat Legnicz obir dy vorbenanten czinse werdin habin. Des czu bestetegunge vnd czu sychirheyt habin wir en desyn briff gegebin vorsigilt mit vnserm gemeynen ingezegil czu Legnicz, noch Crists geburd dryczenhundirt jar ym eynvndnwenczegisten jare am nesthen dinstage vor sante Elyzabeth tage. Do by syn gewest vnsere getreuwen lyben, her Bernhard von Furstynsteyne, her Grunhobt von Czedelicz, Hannus Kranch, Nitsche von der Ossla, Nicclos Syfridisdorff, Burgult Slewicz vnd her Thomas Gythan vnser schriber, dem wir desin briff beuolen.

Altes Privilegb. p. 44b. — Bitschens Privilegb. f. CXXXVb.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866